حسب كتشافات ألمانية جديدة قام بيها البروفيسور "كــْـلاوْس بيـشـل"، رئيس معهد الطب الشرعي ديال المستشفى الجامعي "هامبورك إيـبن دورْف" أو عضو الأكاديمية الألمانية للعلوم أو اللي تكلم عليها نهار الخميس 2020/05/07 فى قناة التلفزة الألمانية "داسْ أرَسـْـتـه"، عمومية، تبـيـيــّـن بفضل الـتشريحات اللي فات عددها 190 بأن فيروس كرونا كيجلـط الدم فى الأوردة اللي كيوصل من بعد لللاوعية الدموية ديال الرية، فى هاد الحالة كيتكلم البروفيسور "كــْـلاوْس بيـشـل" على "الإنسداد الـرئوي"، "إيمبولي بولـمونير"، كما ما خفاش أن إلتهاب الرية، "إينفلاماسيون بولمونير"، باقي كيتصدر أسباب الوفيات، الفرق بيناتهم هو أن إلـتهاب الرية راجع للاصابة أنسجة الرية من طرف باكتيريات أوْ فيروسات، أمـّـا "الانسداد الرئوي" متعلق بتجلط الدم فى نظام أوردة الذات، أو من تمــّـا كيـستعمل مجرى الدم باش يوصل للنظام الرئوي.

يعني فى هاد الحالة كيف ما صرّح البروفيسور "كــْـلاوْس بيـشـل" الوفيات اللي كان سبابها كوفيد تسعطاش راجعة كذلك "لـتـجـلط الدم" أو "الإنسداد الرئوي" اللي كيأدّيوْا فى آخر المطاف للتعطيل الدورة الدموية كيف ما ستنتج البروفيسور "كــْـلاوْس بيـشـل" من خلال الفحوصات اللي قام بيها فى إطار تعميق المعرفة أو المعلومات حول هاد الفيروس اللي شغـل بال جميع دول الكورة الأرضية، أو هاد النتائج فريدة من نوعها على الصعيد الدولي، لأن التشريح فى هاد الميدان بالغ الخطورة أو ما معطيش للكل واحد، ضروري تكون شروط الوقاية، التعقيم أو اللوائح الصحية متـشددة باش ما توقع حتى شي كارثة إنسانية، بحال اللي طرى فى الصين.

"معهد روبيرت كوخ"، بحال "معهد باستور" فى فرانسا، نصح فى اللول الأطبة الشرعيين ما إقوموش بعملية التشريح، لأن من المحتمل يتعاداوْا، أمــّـا فى سويسرا ما عندهم مشكل مع عمليات التشريح، لأن الإخصائيين السويسريين كيقولوا أنهم باغيين نيت يتعرفوا على سبب الوفيات، أو هاد من حق كل واحد باش يمكن ليهم إعالجوه من بعد بالأدوية المناسبة أو الفعالة، لأنه اللي بغى يصرع هاد الفيروس خصـّـو إكون أسرع منو، إحاصرو من اللول كيف كيطرى دابا عن

طريق تكثيف الإختبارات التشخيصية من طرف وزارة الصحة المغربية، أو الهدف من هاد العملية هو العزل المبكر قصد العلاج، رصد مخالطي المرضى أو ربح الوقت بغية تخفيض سرعة نتشار فيروس كورونا.

بالنسبة للمدير قسم الطب العناية المركزة البروفيسور "شـْـتيـفان كـْـلوكه" اللي خـدّام حتى هو فى المستشفى الجامعي "هامبورك إيـبن دورْف" هاد النتائج الجديدة غادي تفتح مقاربة علاجية هادفة، أنجع أو حسن من قبل، فى هاد الحالة غادي يمكن ليه يستعمل مميعات الدم، بحال "هيبارين" حسب تطور أو حتياجات كل مصاب بكوفيد تسعطاش، أو الجرع فى ما يخص هاد الميدان ما يمكن إحدّدوها غير "ذوي الخبرة والإختصاص"، يعني هاد المهمة مخوّلة غير للوزارة الصحة المغربية فقط، هي صاحبة القرار الأخير، صاحبة الكلمة الفصل.

بلا أي مزايدة من طرف النباتيين ولا ّ العشــّـابة، لأن العلم السليم، الرصين قائم على أسس، على دراسات، على وثائق، أدلة دامغة، على تجارب سريرية، على تقارير تقنية معمقة، غير هاد البحث اللي قام بيه البروفيسور "كــْـلاوْس بيـشـل" درسوه، غربلوه 4 ديال العلماء مستقلين من قبل، من نفس الإختصاص، عاد سمحوا ليه يـنشر العمل العلمي اللي سهر على إنجازو هو الطاقم اللي كيمد ليه يد المساعدة، ماشي غير ثيق بييا، كيف كنسمعوا بعد المرات هنا أو لهيه، "نقذنا عل الأقل 200 مواطن/مواطنة كولا ّ نهار من وفاة مؤكـدة"، فينا هي الدراسة؟ شكون اللي كتبها؟ فاين تنشارات؟ فيناهوم المراجع؟ ولا ّ كتـكـتـب، كتـهضر من فراغ؟ يعني لوحة شعرية لا غير، من وحي الخيال الفياض، نعس ما ناض.

باش ما يبقاش البروفيسور "كــْـلاوْس بيـشـل" غير فى شرح الغيب أو التنجيم عطانا المصدر فاين يمكن للكل واحد يتحقق، يطـّـالع، يقرى النتائج اللي توصل ليها هو أو الطاقم ديالو، ملحوظة، لغة العلوم هي النكليزية، لا الفرانساوية ولا العربية، أو على اللغة النكليزية خصـّـنا نركزوا فى المستقبل القريب فى جميع المستويات، من التحضيري حتى الجامعة، أو اللغة الفرانساوية تتعوض باللغة النكليزية، لغة العالم، العلوم، الإقتصاد أو الرخاء:

هادي هي خاصية المجتمعات المفتوحة على عكس المجتمعات المغلوقة فاين عدم الثقة، عدم الشفافية، الكذوب، المكيدة هي اللي سايدة، هاد البحث القيم تنشر فى "آنالس أوف إينترنل ميديسين"، جريدة أمريكية مرموقة متخصصة فى الطب الباطني، أما فى ما يخص تصريحات البروفيسور "كــْـلاوْس بيـشـل" أو البروفيسور "شـْـتيـفان كـْـلوكه" ها الروابط:

ندوة صحفية، 2020/05/08، المستشفى الجامعي "هامبورك إيبن دورف"

الرابط اللول خاص بالتلفزة الوطنية الألمانية، بعض الأرقام: 23000 مستخدم، 11 برامج تليفيزيونية جهوية، 55 محطة إذاعية، ميزانية: 6،3 مليار يورو، كثر من 100 مراسل فى 30 دولة، رقم واحد فى ألمانيا.

جميع مساهمات المجتمع المدني الحر، غير المحزب، هدفو التوعية أو تخفيف الكلفة الإنسانية أو المادية جراء هاد الجايحة الفتاكة باش تخروج المملكة المغربية سالمة، غانمة من هاد الإمتحان العسير، خصّ كولشي إيجي من القلب، إيلا بغيتي تكسب قلوبة الناس، أحسن عمل يمكن لينا نقوموا بيه اليوما هو نبنيوْا جسور التفاؤل، جسور النور أو السلوان.



 مراد علمي