ما كاينش اللي غادي إقول ليك بأنها دّات ولا أورو واحد ولا ّ عملات الفلوس، ستثمرات مهارتها، خبرتها فى السياسة ولا ّ جمعات بين المال، الجاه أو السياسة، براسها كاتمشي ألــّـمارشي برجليها ليومينا هادا، بحال أيـّـها الناس، ما عمّرها بسـّـلات على الناس قالت ليهم ضروري تمشيوْا ألــّـكـنيسة ولا ّ ما كاتصلــّـيوْش ما نسلــّـمش عليكم، خاصـّـنا نعرفوا بأن مرجعيتها مرجعية دينية، داخلة سوق راسها، اللي كايهمها هو التقدم الملموس، خلق فرص الشغل، العدالة الإجتماعية، التماسك الإجتماعي، لمّ الشمل، التضامن، الرفاهية، الرخاء لــَـجميع المواطنات، المواطنين كانوا مسيحيين، مسلمين، بوديين ولا ّ ما عندهم حتى شي دين.

بالنسبة ليها النبش فى أعراض، معتقدات الناس الشخصية غادي ديما تفـرّق كثر ما تجمع، أو إآمانو حتى بدجاجة، نتا سوقك؟ بحال بعض البوديين فى الهند ردّوا ترامب ربّ، بداوْا كايعبدوه، يمكن لينا نستغربوا، ولاكن عندهم الحق إعبدوا اللي بغاوْا، لأن هاد الأمور أمور شخصية، بكثرة المحبة، الإعتراف الامشروط كايلـقــّـبوها الألمان غير ب "موتي"، يعني "لــَـمـّـيمة"، فى أغنية مسلم أو كلماتها الراقية "يـمــّـا"، كانت ميركيل ديما صبورة، خدومة أو مخلصة ألـْـدرجة حتى اللي ماشي من حزبها كايشهد ليها بوفاءها للتعهداتها أو بالتفاني فى عملها، كاتــّـعتابر اليوما من أبرع مهندسي السياسات العمومية الألمانية على الإطلاق.

أو هاد الجمعة اللي دازت قبل ما تنطق ولا بكلمة وحدة تهزّوا الناس من بلايصهم أو بداوْا كايصفــّـقوا، غير سلات خطابها 10 الدقايق أو أعضاء، نشطاء الحزب بداوْا عاودتاني كايصفقوا، بلا ما إدفعهم ولا ّ إعـنـــّـفهم حـدّ، هما صحاب القرار، أو التصفيقات الحارة والشحـّـة ديما مقياس التحنن، التعاطف أو المودة الخالصة ولا ّ رمز الإجحاف، العتو أو الجور.

الشخصية السياسية ديما مرتابطة بميولات الشخص اللي كاتفرّقو على ناس خرين من نفس المجتمع، فى العمق يمكن لينا نصنـفوا 5 ديال النماذج: التوافق، التجاوب، التوازن العاطفي، الإخلاص أوالإنفتاح على تجارب جديدة، التوافق عندو علاقة بالآخر اللي باغي تربط معاه علاقة طيبة، أو الناس اللي كايتوفروا على هاد الخاصية كايكونوا صدّيقين، كايحبـّـوا الخير ألكول واحد، طييبين القلب أو الخلق، كايفضلوا التعاون على المنافسة، بحال آنكيلا ميركيل تمامـًا، التجاوب كايعني ضرورة الإهتمام بالآخر أو أتــّـفاعل معاه، هاد القيمة المضافة كاتلقاها عن الناس اللي ناشطين، عزيز عليهم إشاركوا الناس هواجسهم، مشارعهم، أحلامهم أو اللي يمكن ليهم إفرضوا وجودهم إيلا قتضى الحال، أمـّـا التوازن العاطفي ضروري إكون حاضر باش يمكن للـناس إتــّـكلوا عليك بلا ما تبقى كاتــّـلاعب بعواطفهم لأنك نتا براسك ما توازنش عاطفيا أو كاتعبث فى الناس كيف رشقات ليك، السياسيين اللي كايتوفروا على هاد الخصلة يمكن لينا نوصفهم بأنهم دؤوبين، متحكمين فى الملفات اللي بين يدّيهم، منظمين، مبدعين، أو إطرى اللي بغى إكون، ما عمـّـرهم كايفقضوا أعصابهم ولا ّ صوابهم، كايعرفوا يتحكــّـموا فى عواطفهم السلبية لا من غمة، خيبة أمل، ولا ّ ستشاط ولا ّ كاع غريزة الإنتقام، الإنفتاح على تجارب جديدة حتى هي ضرورية تكون من ضمن هاد الخاصيات ديال السياسي ولا ّ السياسية المتميزة، لأن هاد النوع من الساسة كايكون سموح، متعدد الإختصاصات أو الإهتمامات، باغي يكسب مهارات، خبرات جديدة، ماشي بحال إخوان المغرب اللي عندهم مشروع واحد جديد/قديم: تجداد لوضو، بوق فى كول حومة قصد أسلمة مفاصل الدولة صحة.

جميع هاد الخصل الحميدة متوفرة فى آنكيلا ميركيل، سبعة ديال رؤساء الدولة الألمانية عرفات البلاد، كانقولوا المستشارة الألمانية، ولاكن فى الحقيقة هي رئيسة الدولة الألمانية، أمــّـا رئيس الدولة الألمانية، هادا غير منصب فخري، ممنوع عليه يدخـّـل فى السياسات العمومية، ولاكن ما كاين حتى شي رئيس الدولة أثر على مسار الدولة الألمانية بحال آنكيلا

ميركيل، بالنسبة ألهيلموت كول كان الراجل أو المنصب مضـّـاربين مع بعضياتهم، بحال إيلا متصنطح، مـطــّاول على هاد المنصب، أمـّـا كيرت شرودار اللي جا من موراه، كانت علاقة خطف، غزو رئاسة الدولة الألمانية، قبل من يرجع رئيس الدولة كاينة واحد التصويرة مبيـيّــناه قابط قطبان من الحديد ديال سور ديوان الرئاسة، بحال إيلا بغى إقول: "وا خلــّـيوْني ندخل"، ميركيل بحالها بحال لباسها أو شعبها: ما عمـّـرها تجيك ألــّـخاطر أنهم ما كايتشابهوش، بالنسبة ألـــّـعالم الخارجي ميركيل هي ألمانيا، أو فى بعض الحالات حتى أوروبا كولــّـها، أو كاين واحد النوع من التماهي كبير بينها أو بين جل شعبها، يلا ّه اليمين المتطرف اللي رافضها اللي ما كرهش إرحـّـل جميع المسلمين أو الآجانب، شحال هادي كانوا الساسة فى ألمانيا كايستقبلوهم المعارضين بالصفارات، الصخب أو الإستهجان، إيلا جات ميركيل بالعكس عمـّـات البهجة، الفرحة.

كاتــّـعـتابر ميركيل من أفضل الساسة اللي عرفات ألمانيا، لأنها بزاف ديال الحوايج ما كاتــوفــّـرش عليها: مـا مغـروراش، ما طـمــّـاعاش، مـا متكـبــّـراش، مـا معــڭـازاش، ما كاتستعملش كلام السلاڭط، بحال اللي طرى خلال المجلس الوطني ديال "حزب الحزكة الشعبية"، أو حتى اللي نتاقدها، بغى إنال منها كاتقول ليه: "أنا سعيدة باللي عايشين فى بلاد يمكن ليك تبدي بريـّـك بكول حرية"، هادي حجة مضادة، غير بالفن كاتقلي اللي بغى يقليها فى زيتو، بالنسبة ألـْـمركيل السلطة حاجة عادية اللي ما محتاجة ألـْـحتى شي أكسيسوارات خرين، أو إيلا ستقبلات، هضرات مع المواطنات، المواطنين، ما عمـّـرهم كايحسـّـوا بأنهم قل منها قيمة، يعني مسلمة نموذجية.

كانت ميركيل ديما كاتخـمــّـم فى النتيجة، إيلا غادي نخفق، ما نقـدّش على هاد المشروع أوْ لاخور، علاش نضييـّـع وقتي، نبذر أموال الشعب؟ واحد المرة سوّلها واحد الطفل فى الصين: "واش نتيـيا سعيدة تعيشي فى ألمانيا؟" "بالطبع، أنا سعيدة فى ألمانيا"، يعني ألمانيا مقارنة مع العالم بأسره، بلا ما توبــّـخ الدري الصغير، تلومو، ردّات عليه بجواب بسيط، لاكن عميق الدلالة، ميركيل ما تكونش ميركيل إيلا ما سكنهاش الشك،

الشك فى بلادها أو تطورها، السؤال اللي شاغلها هو: "واش أقصى تحقيق الذات غادي إأدّي حتمــًـا للنتيجة المتوخاة باش يبقاوْا عايشين الألمان فى الرفاهية، حياة الرغد أو الرخاء؟" باقية شاكــّــة، أو الشك فضيلة، "ديكارت" كان قال واحد النهار: "الشك هو بـْـدو الحكمة".



مراد علمي