الحروب اللي قامت بيها روسيا فى الشيشان من 1994 حتى 1996 أو من 1999 ليومينا هادا، بالوكالة، يمكن لينا نعتابروها من أبشع الحروب اللي عاشتها أوروبا من بعد الحرب العالمية التــّـانية، المغزى من هاد العمليات ألا ّ إنسانية هي تركيع، تجويع أو إبادة الشعب الشيشاني، كثير من المواطنين العاديين ذاقوا مرارة الحكرة، التعذيب أو الإهانة اليومية.

ما كاين حتى شي مبرر فى ما يخص العمليات الحربية الروسية الوحشية فى حق شعب الشيشان، العاصمة كروسني تهدّمات "عن كاملها"، بحال اللي طرى فى شرق حلب اليوما، قبل كانوا كايعيشوا فى كروسني 400 آلف نسمة، اليوما يالاّه شي 200 آلف، القوات الروسية كانوا بالأخص كايحاربوا، إقتلوا المدنيين، ما خلا ّوْا ما هدّموا: سبيطار لولادة، باش يقضيوْا على كول شيشاني باقي ما شافش ضوء الدنيا، السوق اللي كايجيوْا ليه الناس باش يتقدّاوْا، الجامع فاين كانوا الناس كايصـلـّـيوْا فى "كالينين"، يعني التدمير المتعمـّـد للبنية التحتية، لحد الآن ماتوا كثر من 000 180 شخص، حتى المدنيين اللي كانوا نازحين، هاربين من الحرب ما نجاوْش من الطيارات الروسية، حتى ماتوا المياوات فى الطريق فى عام 1999.

ستعملات روسيا فى الحروب الجـّوج سلاح الدمار الشامل اللي محظورة على الصعيد العالمي، لا من قنابل عنقودية، فراغية، كيماوية، المدنيين ذاقوا كول نوع من التعذيب: الإغتصاب الجماعي، الضرب بالضو، سلخ الجلد من اللحم، أمـّـا الرجال عطاوْهم سمييات ديال العيالات باش إهينوهم كثر، غير فى عام 2001 عثروا الشيشانيين فى "شانكالا" على مقابر جماعية، جثمان هاد المدنيين كايحملوا كولــّـهم علامات التعذيب، أو

ليومينا هادا الشيشان كولــّـها ألغام، اللي خرج على الطريق المعلــّـمة، طارت ليه يـدّ أوْ رجل.

ضروري نعرفوا شنو بغى بوتين فى سوريا اللي ما خلا ّ ما قصف بالطيارات ديالو، المدارس، السبيطارات، الأسواق إلخ، بحال فى كروسني، يمكن لينا نعتابروا هاد العماليات الحربية جرائم حرب بحال اللي قام بيها جورج بوش فى العراق، ولاكن ما يستغربش بوتين إيلا دفع هاكدا الشيشان إقوموا بعماليات إرهابية اللي دائما غادي تكون سلاح الضعيف اللي ما عندو حتى فرصة خرى فاين إفــّـرغ كبتو، نكبتو، حزنو، يعني العنف كايتوجه للذات فى أول الأمر، ياك غادي غادي، نـدّي معايا شي وحدين خرين، ولاكن الإرهاب ما عـمــّـرو إكون هو الحـل، لأنه من المستحيل تعويض مفسدة بمفسدة أبشع منها.

سياسة بوتين فى سوريا واضحة، ما بغاش غير إكون عندو منفذ، موقع ستراتيجي فى البحر الأبيض المتوسط ولاكن بغى إفرض وجودو كازعيم قوة عظمى، ما كايخافش أو باغي إحدّ هيمنة من واشينطن فى العالم، باغي روسيا تلعب من اليوم فصاعدا دور فعال، مهم، يعني ما كاينش غير ميريكان ولاكن حتى آنــا، الحق يوقال: الغرب رتاكب أخطاء قاتلة، فى عوط ما إدخـّـل فى عتبارو حساسيات، توجسات النخبة السياسية الروسية، مغطرس، عاجبو راسو، كايدير اللي بغى، حتى بدا الحلف الأطلسي غير كايكبــّـر فى النفوذ ديالو حتى لقى راسو فى مواجهة مع الحدود الروسية فى أوكراينا، هاكدا حسـّـات النخبة الروسية بإهانة غير مسبوقة.

بالنسبة للروس الدول الغربية، دول كذّابة، مدّياها غير فى المصالح ديالها، علاش ما أدّخلاتش فى روواندا ولا ّ فى سريبرينـيـسكا، باش تنهي هاد المأساة؟ علاش أدّخلات فى كوزوفـو أو ساندات بوش فى حربو على العراق فى عام 2003؟ حتى باراك أوباما ما مشى حتى ضرب الطر ّ ألــْـروسيا لمـّـا نعـتــّـها بالقوى الإقليمية، يعني قوى عظمى؟ بازّاف عليك.

بالنسبة ألــْـبوتين الغـرب هو مول جميع هاد المصايب اللي طارية فى العالم هاد العشر سنين، هو المسؤول على ثورة أوكراينا، الخريف

العربي، تشتت، تدمير الدول العربية، بالنسبة ألــْـبوتين عرف الغرب كيفاش يستغل ضعـف روسيا هاد الوقت كولـــّـو، على داك الشي ضروري إتــّـقلب الميزان، فى هاد الإطار باغي يصرف كثر من 700 مليار دولار حتى 2020 باش إكون كايتوفر على عسكر، أجهزة حربية حديثة العهد.

بالنسبة ألبوتين بشار الأسد عبء كثر من حليف أو ما كايكن ّ لا ليه، لا للنخبة العسكرية اللي ما كاتــّـوفـر حتى على شي كفاءة، غير الإحتقار، كون ما كانش بوتين فى عام 2015 اللي نقد نظام الأسد الديكتاتوري، المستبد كون راه فى مزبلة التاريخ، ولاكن بجوج عندهم هدف واحد: تدمير شرق حلب، لأن بالنسبة ألـْـنظام الأسد شرق حلب عندو خاصية مهمة، لا بالنسبة للنظام لا المعارضة السورية، هنا فاين كانت غادي تنشئ دولة سورية حرة، ديمقراطية، متحررة من بطش الأسد أو عائلتو اللي سفــّـات دم ّ الشعب أوكاتعتبر من أغنى العائلات فى العالم، مع العلم أن الشعب السوري شعب فقير، مجوّع.

شرق حلب ما كانش تحت نفوذ العصابات الإسلامية المتطرفة، لا! ولاكن تحت نفوذ الشعب اللي باغي الكرامة، العدالة، الديمقراطية الحقيقية أو كان كايشكل بديل حقيقي أو تهديد ألــّـكيان الديكتاتوري الأسدي، على داك الشي كانت المعركة "حامية الوطيس" فى هاد الجهة من المدينة، أو قصف السبيطارات، المدارس، الأسواق ما كان كايدل ّ غير على هدف واحد: إمــّـا الإستسلام ولا ّ الموت بالصوارخ أو الجوع، مع الأسف لقى بوتين مناه فى هاد الجهة من العالم فاين السلطة كاتعرف يلا ّه روسيتة وحدة: القمع أو الدمار!

أمـّـا فى ما يخص المغرب رئيس الحكومة المكلف ضروري يلتزم التحفظ، إيلا كان فى المعارضة إقول اللي بغى، هو حرّ، لأن تدبير شؤون الدولة شي أو زعيم حزب شي آخور، هو مسؤول كدالك على شبيبتو باش ماتقومش بشي حوايج " لا يحمد عليها"، غادي تلزّمو حتى هو، لأن جميع الأحزاب عندها أدبيات، قوانين داخلية، فروع، لجن، هياكل، التحريض

على الإرهاب، القـتـل، العنف كيف أمــّـا نوعو محظور، ماشي غير عندنا ولاكن فى جميع الدول الديمقراطية، لدا زعيم الحزب هو المسؤول اللول على جميع الخرجات الإعلامية ولا ّ العفوية ديال بعض نشطاء الحزب، ضروري يتـبــرّء منهم فى الحين، ماشي حتى تحصد العاصفة الإعلامية الخضر أو اليابس، الحزب بنفسو خصــّـو إقوم بنقد ذاتي جدّي ولا ّ يفصل هاد الأشخاص على الحزب، لأن الخصوم السياسيين غادي ديما يستغلوا هاد الشطحات، العنتاريات غير المسؤولة.

مراد علمي